واجب تدويني مررته لي Female 
..
كتبتة عالسريع ومن دون ترتيب 
..
- اول ماتعلمت الصلاة انا وبينو كنا نوقف جنب امي ونقول ” اس اس اس “ الين مانسلم ..
لأننا مانسمع غير التصفير حق “سبحان الله / بسم الله” وعلى بالنا الصلاة كلها اس اس 
..
- ايام الإبتدائي كنت احس بنات سادس وخامس عمالقة ..
وكانوا كل يوم يمزحون معنا ويلعبونا ويشترون لنا حلويات وحركات ..
وعلى الدلع هذا كله كنت ارجع البيت ابكي اقول لأبوي : والله يا ابوي بنات اكبر واطول منك مرررره يخوفون ..
وكل يوم على هالحالة ..
- اول شيء تعلمته من دخلت المدرسة لا حرف ولا قراءة ولاحفظت جملة ، صديقتي هيا علمتني كيف ارسم نجمة ”ولاتزال تدرس معي بالجامعه”
- مره كنا بفندق وطالعين نازلين ” نحب نلعب بالمصعد ”
والأجانب كثير يسألونا ..
رجعت للروم على طول اقول لأمي اذا قالوا هاو آر يو وش ارررد ؟
قالت : fine thank u
عاد سنترنا بالمصعد يعننا نعرف انجليزي ، وكل ماتكلم احد قلنا : فاين ثانكيو
يسأل عن الإسم : فاين ثانكيو ، اي دور تبون : فاين ثانكيو
انتوا توأم : فاين ثانكيو
والإبتسامه شاقه حلوقنا على بالنا فاهمين ..
- مره اختي اللي اصغر مني جاتني ومعها موس ، قالت : هذا وشو ؟ قلت : مشط ياغبيه ..
قالت : ليش صغير كذا ؟
قلت : حق الحواجب ياغبيه ..
<< تنافخ 
بعدها طلعتلنا اختي للصالة ومافيها حواجب ..
قعدنا نص سنه تقريباً نرسم حواجبها بالكحل ..
- كنت احب اقرأ مجلة ماجد خاصة قصة بيبي ، تقريباً كل الأعداد كانت عندنا ..
- كنت احب قصص الأنبياء ودايم امي تشتريلنا كتب صغيرة واحياناً هي تسولف لنا بنفسها قبل النوم ..
- ايام ماكنا صغار انا وبينو واخوي كنا نصحى بدري دايم ونونس نفسنا بنفسنا ..
موقعنا المفضل للجلسة كان قدام الشباك ، مره لقينا عصفورة ثابته مو ناوية تطير ..
قال اخوي : يمكن صغيرة لسه ماتعرف تطير ، انا بعلمها
قام سوا زي افلام الكرتون لما يطلقون الحمامة للهوا ، الفرق هنا ان حمامتنا ماتحركت ، اخوي نفض يده يبي يغصبها ، هبطت للأسفل وتحرك جناحها بسرعه واخوي مبسوط يقول : قلتلكم ..
مادرينا الا دبججج ، ماتت ..
- اذكر يوم كنا بالشرقية الإجازة اللي بين صف ثالث ورابع ..
امي راحت للسوق مع خالتي ، وماقعد ببيت خالتي غير انا وبينو وبنت خالتي والشغالة ..
المهم كان عندهم سيب طوييييل ومظلم ، يوم طلعنا الحوش نلعب الا شفنا ظل عربية وكأن فيه احد ..
وصراخ وخوف وحالتنا حالة ، ونجري عالمطبخ ونفتح درج السكاكين ، انا اخذت اكبر وحده حقت تقطيع اللحم ” اللي تجيكم مستطيله ” وبينو اخذت ملعقه غرف ” خبله هههه” وبنت خالتني اختارت لها سلاح مدري وشو ..
ومن اليوم خايفين وقفلنا ابواب البيت كلها ونخطط اذا جاتنا العجوزة وش نسوي؟
لاحظو الظل هذاك صار عجوزة ، عاد بنت خالتي ذي عليها كذب مو طبيعي ، وانا وبينو دايم نصدقها ..
بعدها دقينا على 999 ، بالعادة ماقد شفت احد يدق على الشرطة الا بالأفلام المصرية ..
يوم رد علي الرجال قلت : آه ياحدرة الزابط عندنا حرامي ..
قال : وشو ؟؟؟!!!!
قلت: حرااامي حرااامي بسرعه بيقتلنا ..
- صديقاتنا كلهم اسماءهم فيها راء ..
فغيده ، ابغاغ ، نوغه ، مناغ ، وكنا نكتة العائلة ..
ومانطقت حرف الراء الا برابع ابتدائي بعد معاناة ، لما كنت اردد اغنية تجي بسبيس تون ” لماذا تطيرر الطيورر في السماء ….الخ”
استمريت سنة اردد هالأغنية احس بالإمتنان ..
الذكريات كثيييرة والله ..
دايم عالبال لكن لما نستدعيها ماتجي ..
طفولتي كانت شقية مميزة عامرة بكل شيء حلو ، كنا مانعرف الحقد ، مانفرق بين اللي يكرهنا ويحبنا ، نشاغب نضحك نروح نجي مايهمنا احد ، اهم شيء مبسوطين ..
كانت هاذي البراءة ، اللي نتمنى الحين نشوفها في الكبار وفي علاقاتنا ومانحس بصعوبة واحنا نمارسها ..
امرر الواجب لـ :
زهور الحب ، أبرار ، براري ، بونا ، المستبدة ، الوافي ، حنان ، ندى ، هيفاء
