4 اشياء تحب تشوفها في رمضان :
- الموائد الرمضانية واعمال الخير .
- ابتسامة طفل وهو يتلقى صدقته .
- الروحانية المملوءة في الجوّ ، ومسابقة الكل على الطاعة ، الشيء اللي يخليك تنبسط وبنفس الوقت تفكر “ليش مانصير كذا طوال العام ؟ ولا إسلامنا مايظهر الا برمضان!”
- لما يوصلك اتصال من صديق قديم اشغلته الدنيا عنك حتى يهنئك برمضان ، يامحلاه من شهر جمعنا على خير .
4 اشياء ماودك تشوفها في رمضان :
- سُفرة بلا تمرة .
قال رسول الله صلى الله عليه وسلم : يا عائشة ! بيت لا تمر فيه ، جياع أهله . يا عائشة ! بيت لا تمر فيه جياع أهله - أو جاع أهله - قالها مرتين ، أو ثلاثا .
- سباق القنوات الى مالا خير فيه ولا جائزه من وراه ، وضع مخجل لنا كمسلمين ماودي اتكلم عنه لأني ماببقي ولا بخلي .
يعني حتى رسالة وحدة هادفة تبي تطلع فيها بنهاية المسلسل ماتلقى !
- قطع الأرحام .
رمضان شهر كله مغفره ومودة ، مايسرّك تشوف اللي مقاطعين بعض ومستمرين لا سلام ولا حكي بهالشهر ، التنازل حلو بهالمواقف وفيه الأجر والله .
- شخص لو تسأله انت بأي شهر يرد عليك جمادى الثاني .
لا صلاة تراويح ، لا قرآن ، لا عبادة ، شهر زيّه زي اي الشهور اللهم بيكون فيه بوفيه مفتوح الساعه 7 .
هالفئة بالذات تشغل تفكيري كثير ؛ عايشين بغفله ومتعودين الكل ساكت عليهم ، ودك باللي يحط ايده عليهم ويدلهم بس .
اللهم إنّا نسألك فيه مايرضيك ، ونعوذ بك مما يؤذيك ، ونسألك التوفيق فيه .
كل عام وانتم بكل صحة وسلامة .
..