قال عليه الصلاة والسلام: “من كانت الدنيا همه فرق الله عليه أمره وجعل فقره بين عينيه ولم يأته من الدنيا إلا ما كتب له ومن كانت الآخرة نيته جمع الله عليه أمره وجعل غناه في قلبه وأتته الدنيا وهي راغمة” .
Quote 9
29 أغسطس, 2010
عن فتوى الكلباني
25 يونيو, 2010بس سؤال :
من متى صرنا نتبع اللي يرضينا ونسينا اللي يرضي ربنا ؟
وانبسط ياعاصي !
الواحد يفتح عقله ولا يصير امّعه زي البزر اللي ماد ايده وينتظر مين يشده وبأي اتجاه ..
لو ان ايمانك قوي بالله فعلاً وتدور رضاه ، ماكان انبسطت بحاجه تافهه زي كذا ، وانت بيقينك وداخلك عارف انها غلط ..
يعني نلعب على مين بالله ؟
مو ملاك ولا انكر سماعي للأغاني ، لكن انكر التصرفات الطفولية المبسوطة بالفتوى وهي عارفة انها خاطئة ..
كلنا نحاول نترك هالشيء والمفروض نستمر نساعد بعض ، لكن الله يصلحك انت وياه لاتفكر تخلي غيرك يستمر وتقول له “صارت حلال” !
Hello Friends
17 يونيو, 2010في مثل هاليوم من السنة الماضية افتتحت مدونتي 
سنة هااادية وحلوة بتواصلكم والله ..
بأول تدوينة لي قلت اني بحكي وبخربط وباخذ راحتي بعيد عن التصميم ..
ماقصرت حكيت واخذت راحتي ، لكن لا ازال قريبة من التصميم 
..
اكثر شيء حبيته خلال هالفترة هو تصاميم المدونات ، وصلتني طلبات دورات واستفسارات كثير ..
شيء حلو ان الرغبة بتعلمها زادت ؛ من قبل التركيز كان اكثر عالمنتديات لحالها ..
غيرت القالب ، واضفت صفحة جديدة باسم Blogs Design ..
Thank u all 
آيفون ، عين ، خرابيش خرابيش
13 يونيو, 2010
عندي امتحانات فاينلز هالأسبوع ، ولافكرت اقرب من المدونة او طلبات التصميم ..
بس عندي سالفة مدري هي تضحك ولا تبكي ولا وش بالضبط !
اللي متابعني في تويتر والفيس و حتى اللي معي بالجامعه كلهم عارفين عن معاناتي مع الآيفون ..
بالنسبة لي آيفوني كان حياتي كلها ، ايميلات كتب افلام راديو تي-في جيمز تواصل .. يعني مو جوال بس ..
قبل 4 شهور فجأه خرب الـ Wifi عندي وصار مايلقط اشارة الدي اس ال ، كذا فجأه !
صبرت لأني وقتها بامتحانات نصفية وقلت مو وقته ..
ومبسوطة بالثيمين الجديدة اللي سويتهم ..
بعد الامتحانات صرت احتاح الواي فاي بشكل اساسي وطول الوقت ..
بدأ البحث في النت ، مابقيت ولا صفحة مادخلتها : مواقع عربية على اجنبيه حتى اللي ماعرفت لغتها ترجمتها !
جربت كل الحلول ، واللي كان يخليني استغرب ان كل حل كان يصلح مع كم شخص في مكان آخر من هالعالم ..
واللي مالقى الحل يجرب اللي بعده ويصلح ويرجع الوضع تمام ..
الا انا ! ..
لدرجة حطيت الآيفون بالفريزر لعشرين دقيقة (طريقة لقيتها باليوتيوب) هههههه
الحين انتهت الحلول المنزلية ، نجي للشغل الجد ..
وديته لمحل – صلحوه – رجع صالح – رجعته لهم خربان باليوم الثاني
وديته لمحل – قال المشكلة في المذربورد ولازم يتودى الشركة
وديته لمحل الشركة – صلحوه – بعد مارجعلي بخمس دقايق لقيته خرب والبطارية ماتشحن خير شر
رجعته لمحل الشركة – رجعوه لي صالح ودموع الفرح في عيوني يوم شفت اشاره الواي فاي شغالة
اخيراً الحياة صارت حلوة ! ومستحيل اكره الآيفون بعد ذا كله ، تظل ابل شركة كبيره بعيني ..
مامرت خمس دقايق الا تكلمني باتي الصباح بعد ماركبت الشريحة قبل اول امتحان هالأسبوع ، وصياح وحشتيني وماوحشتيني ..
الا تقول ايمان ما اسمعك ! وتفصل المكالمة ..
ومن هنا تبدأ مشكلة جديدة ان الجهاز مايلقط اشارة وكل مادق علي احد يطلع له جوالي مقفل او من نفسه يقفل المكالمة بوجهه !
انا خلاص ماعاد اقدر اذاكر ، والحرارة بتطلع من عيوني من القهر ..
واحس العالم طفشت مني : آيفوني خرب ! – آيفوني صلح ! – آيفوني خرب – آيفوني صلح ! …. الى مالا نهاية طول 4 شهووور ..
4 شهور احد متخيل حالي بالله ؟
وطول الوقت كل مارجع الجهاز وقبل لا اوديه المحل احاول اصلحه بنفسي ، سويت ريستور عشرين الف مره وسويت كل اللي تتخيلون ..
بينو حزنت علي هالأسبوع وصارت تقول خلاص خلاص نامي وانا بصلحة << لاحظوا صرت انام من القهر ومابي اشوف احد 
..
صحتني بينو وتبشرني “صلحته الله يقلعتس انتي وياه ! منتي صاحية” وانبسطت وامي تطالع فيني ارتاحت بعد النوبه اللي صابتني العصر ..
رجعنا اليوم الثاني وخرب بنفس مشكلة المكالمات .. وصلحته بينو مره ثانيه ..
اليوم اللي بعده خرب بنفس المشكلة .. واخذته بينو وصلحته !
المصيبة اسأل بينو وش سويتي ، تقول ولا شيء ، بس يشتغل على طول ..
طنشت وما اهتميت ، المهم انه يصلح ..
AND TA DA
رجع خرب << بالله موب مهزله ؟
هنا انا قلت الوضع موب طبيعي ، 4 شهور ياعالم والجهاز راجعلي بمذر بورد جديدة من الشركة ، صاكته عين الييييمه بجد ، وكل ماكلمتني وحده من البنات تقول “ادق عليك جوالك مغلق ! مو صلحوه لك الشركه؟” ارد واقولهم بإنه خرب مره ثانيه والإجابه “ايمان وش ذا وربي عييين ”
اللي خلاني اكتب هاللي صار كله هو السطور القادمة :
تو بينو تقول وش صار على آيفونك ؟ قلت ماجربته عشان لا انقهر وابي اذاكر زين ..
مسكت بينو الآيفون ودقت منه على رقمها ، وشغال تمام ! وقامت تصايح علي انتي موب صاحية اصلاً ، شوفيه شغال تمام ..
قلت والله مايشتغل معي …
جيت بنفس اللحظة دقيت منه على رقمها ومو راضي يدق !
(لحظات سكون كأننا في فلم رعب كوميدي)
دخلنا الغرفة عشان نبدأ نجرب ، سمت بينو وقالت بنجرب 4 مرات ، مره انتي تدقين من آيفونتس ومره انا …
اذا دقيت على بينو ، وهي مقابلتني … صوتي ما يوصل لها في الجوال ، لكن انا اسمعها وهي تتكلم ..
المحاولة الثانية : دقت بينو من آيفوني على آيفونها و المكالمة وصلت والوضع تمام ومافي اي مشكلة ..
المحاولة الثالثة : دقيت من آيفوني على بينو … مايدق ، وبعد كم محاولة شبك خط وكلمتها واسمع صوتها لكن ماتسمعني ..
المحاولة الرابعة : بالعربي بينو تمسك الجوال كله تمام ، ولما امسكه انا ماتوصل المكالمة او يتعطل وصولها ..
كل ذا بخمس دقايق نتبادل الأجهزه ، يصلح معها ويخرب معي ..
سألت بينو “طيب يوم مايوصل صوتي وش يطلع ؟” ردت “ولا شيء ! زي الهوا والشوشره بس”
تذكرت انه لما كلمتني باتي الصباح صار نفس الشيء .. انا اسمعها لكن ماتسمعني ، وصار نفس الشيء مع يوني ومع ريما ومع الكل ..
مهزلة لاتنسى حبيت اسجلها للتاريخ عن معاناة استمرت 4 شهور ..
راح نتبادل انا وبينو الأجهزة وهذا الحل الوحيد ..
مو مبسوطة لشيء الا اني اكتشفت السبب : انا ! وبكل اسف ..
شكراً لصبركم ومتابعتكم ..
ترا الآيفون حلو ، والعين حق وربي ..
دعواتكم بالفاينلز ..
Quote 8
4 يونيو, 2010
الله ذاته لا يحاكم الإنسان إلا بعد موته ، فلماذا نحاكمه نحن في حياته ؟
جونسون
Book Recommendations
26 أبريل, 2010
The Notebook , by Nicholas Sparks
romantic novel
don’t even think about watching the movie , just read the book
الفلم ظلم الرواية كثير 
دايم الأحداث تكون في التفاصيل الصغيرة اللي محد يهتم فيها الا صاحبها ، وهذا اللي ميّز اسلوب نيكولاس ..
يعيّشك جوّ مع التفاصيل ، لدرجة تحس نفسك في القصه وبين الأشخاص ولك سنوات عايش معهم ..
The King of Attolia , by Megan Whalen Turner
juvenile fiction (series)
الكتاب الثالث من سلسلة الكاتبه megan ، ممتع جداً ..
The Adventures of Sherlock Holmes , by Arthur Conan Doyle
Detective fiction - short stories
good bunch of audio books u can find here or here
Enjoy reading
Quote 7
18 مارس, 2010
عن أبي هريرة رضي الله عنه قال : قال رسول الله صلى الله عليه و سلم :
“أحبب حبيبك هونا ما، عسى أن يكون بغيضك يوماً ما، وأبغض بغيضك هوناً ما، عسى أن يكون حبيبك يوماً ما”
Beginnings
18 مارس, 2010
دائماً ماتسعدنا البدايات
لأنها مبهمه …
Quote 6
8 فبراير, 2010
رأيك بنفسك أهم من رأي الآخرين فيك .
سنيكا
iPhone
4 فبراير, 2010حابة اشاركم بعض التطبيقات بآيفوني ..
بعضها مسلي ، مفيد ، ذات استخدام يومي ، والبعض الآخر للحين ماجربته ..
SMSButler: تطبيق لطيف ، فيه 3 تصنيفات او 4 تقريباً تحتوي رسائل كثيره منوعه عن الصداقه والود وغيره … معبرة صراحة (كلها بالإنجليزي) .
Excuses: واجه اصدقائك بأعذار واهيه / طريفة ، سواءً فوّت يوم ميلاد او موعد مهم او او او (بالإنجليزي) .
Birthdays: يسويلك مزامنة مع حسابك بالفيس بووك ويذكرك بأيام ميلاد الأصدقاء ، واللي ماله حساب بالفيس يقدر بكل بساطة يضيف الموعد ، والتطبيق يذكرك قبلها بيوم او اسبوع او اللي انت تحدد .
Digital Zoom: زووم للكاميرا .
Cycorder: تصوير فيديو .
AwesomeNote: اهم تطبيق عندي ، استخدمه بشكل يومي … بكل بساطة دوّن امورك المهمه بتصنيفاتك الخاصه واشكال تفتح النفس 
..
PS Mobile: برنامج فوتوشوب مبسط للأيفون بتعديلات خفيفة عالصور ، من تعديل للألوان واقتصاص وغيره …
JumiMouse : بديل ماوس للتحكم بالجهاز ، كل اللي عليك تحط آي بي جهازك بالإعدادات وبعدها تحكم بسطح المكتب .
Flashlight: تطبيق يمكن يكون تافه للبعض ومهم للبعض ، خدمني اكثر من مره بلحظات الشده ، التطبيق يعطيك خلفيات محدده توفر لك خدمة الفلاش .
Ruler: مسطرة ، يمكن نحتاجها يوم .
Sygic GCC: غني عن التعريف ، من اكثر التطبيقات اللي تتحمل بالستور ، خرائط دول الخليج كامله (مع دعم كامل للغة العربية) .
Locate: سواءً تدور على اقرب صيدلية ولا مكتبه ولا سوبر ماركت …الخ ، هالتطبيق يساعدك .
Mobile Track: حط رقم الجوال بهالتطبيق ، وهو يجيب لك موقعه وعلى خريطة جوجل (احياناً يصيب واحياناً يخطئ) .
Shazam: من اقوى التطبيقات الغنية عن التعريف ، سمعت لك مقطع من فلم او مسلسل او إعلان او حتى بجهازك مقطع مو عارف مين المغني ؛ هالتطبيق يجيبلك كل المعلومات وبرضو رابط الفيديوكليب والكلمات وخيارات كثيره غيرها .
FakeCaller: متوهق وتبي تصرف نفسك ، هالتطبيق يوفر لك مكالمة مزيفة (تطبيق بطل)
Megaphone: مايكروفون ، كل اللي عليك تشبك سلك سماعات الستريو بالآيفون وتتكلم ، ينفع لربع المناسبات والحفلات اللي صدف وضاع مكرفونهم 
.
iHound: مهــــــــــــم لأخر درجة ، في حال ضاع آيفونك او انسرق هالتطبيق هو الحل بإذن الله ، حمّل التطبيق وسجّل بالموقع ، اذا صار شيء لآيفونك لاقدر الله ادخل على حسابك بالموقع وهو يطلع موقع آيفونك وقد ايش يبعد عنك 
.
Al Mus’haf: هالتطبيق ابداع ، كأنك تقرأ مصحف حقيقي بإيدك ، مع خيارات تصفح ولا اروع .
iQuran: مصحف برضو ، حملته عشان القراءة الصوتيه فيه .
iAskar: اذكار الصباح والمساء و و و ، من اهم التطبيقات .
Qibla Direction: يحدد لك اتجاه القبلة ، ينفع وقت الكشتات والسفر .
Felaur PDF: جربت تطبيقات كثيرة وكان هذا افضلها لقراءة ملفات PDF ، استخدمه بشكل يومي .
Files+Docs: لقراءة ملفات بصيغ متعددة ، ماجربته للحين ، لكن من بحثي كانو هالبرنامجين من بين الأفضل .
Y! Music + ScionRadio: راديو .
netTV: يفتح لك التي في بوجود النت .
Taptu Search: عباره عن محرك بحث لكل شيء ممكن يخدم الآيفون من خلفيات ونغمات وغيره .
ShooFeeTV: دليل لبرامج التلفزيون ، مره حبيته .
IM+: افضل تطبيق جربته للمسن .
Twitterrific: لتويتر .
Facebook: للفيس .
WhatsApp+WhosHere: تطبيقات للتواصل مع الآيفونيين حول العالم ، وطبعاً كأي خدمه في الشعب العربي لما تفتح التطبيقين لابد تشوف لك شويه مسخره .
WordPress: تطبيق بسيط للوردبريس ، تمنيت اشوف فيه خيارات اكثر .
Deviations: يعرض لك الدايلي ديفشن بالموقع الشهير DeviantArt .
Heart Monitor: لقياس ضربات القلب ، مسلي .
TVUPlayer: روعه هالتطبيق ، من اسمه TV ولابد يكون حولك نت .
AppBox Pro: اكثر من تطبيق مهم في واحد ، كلها شغلات هندسيه .
MCleaner: لحظر بعض المكالمات المزعجة والرسائل 
.
Palringo: ثاني ارهب تطبيق للمسن على قولتهم ، جديد للحين ماجربته .
ToneFXs: لتغيير نغمات الجهاز واستبدالها بنغمات من التطبيق .
التطبيقات كوكتيل مابين السيديا والآيتيونز ستور ، واغلبها تحتاج وجود واي فاي حتى تشتغل .
اما الثيم بقولكم على شيء يضحك ، صممته قبل لا اشتري الآيفون بشهر وجبتلي ايقونات من آخر الدنيا … لكن للحين ماركبته زي منتو شايفين بالصور .
والسبب ان برنامج DiskAid و iFunBox مو راضين يصلحون معي ، وبكل مرة مايظهر الجهاز بالبرنامج .
مو عارفه وش مشكلته !
بالأخير رابط مهم عن الترقية الجديده :
http://www.iphoneislam.com/?p=3564
